काठमाडौं । मधेश प्रदेश क्रिकेट संघले प्रदेशबाट खेल्ने १० खेलाडीलाई सेन्ट्रल कन्ट्र्याक्टमा राखेको छ । प्रदेशबाट खेलिरहेका र नेपाल क्रिकेट संघ (क्यान)को सेन्ट्रल कन्ट्र्याक्टमा नरहेका २ महिलासहित १० खेलाडीलाई सेन्ट्रल कन्ट्र्याक्टमा राखेको हो ।
सम्झौताअनुसार संघले खेलाडीलाई जनही वार्षिक एक लाख २० हजार उपलब्ध गराउनेछ । मधेशका पूर्वकप्तान हरिशंकर साहसहित पवन सरार्फ, अभिषेक तिवारी, रोशन विक, अरनिको यादव, विशाल पटेल, प्रदीप पाशवान र रञ्जितकुमार सेन्ट्रल कन्ट्र्याक्ट जोडिएका छन् ।
महिलातर्फ रोजी कडारी र अलिशा यादवलाई संघले सेन्ट्रल कन्ट्र्याक्टमा राखेको हो ।
खेलाडीको आवश्यकताअनुसार केही सहयोग मिलोस् भन्ने उद्देश्यले पहिलो चरणमा १० खेलाडीलाई सेन्ट्रल कन्ट्र्याक्टमा राखिएको मधेश प्रदेश क्रिकेट संघका सचिव आयुष श्रेष्ठले जानकारी दिए ।
क्यानबाट आउने र स्पोन्सरशिपलाई बचाएर खेलाडीलाई सेन्ट्रल कन्ट्र्याक्टमा राखिएको उनले बताए ।