काठमाडौं । प्रधानमन्त्री केपी शर्मा ओलीले रास्वपा सांसद मनिष झालाई तथ्यमा आधारित भएर प्रश्न सोध्न आग्रह गरेका छन् ।
प्रतिनिधिसभाको बैठकमा झाले सोधेको प्रश्नको जवाफ दिँदै प्रश्न प्रश्नकोरूपमा आए जवाफ दिन सजिलो हुने तर आरोपको रूपमा आएपछि खण्डन गर्ने बाध्यता आइलागेको बताए ।
सांसद झाले प्रधानमन्त्रीले नियुक्त गरेका कर्मचारीको असक्षमताले सरकार फेल भएको जिकिर गरेका थिए ।
झाको प्रश्न थियो ‘तपाईँले नियुक्त गरेका कर्मचारीको असक्षमताका कारण सरकार फेल भएको तथ्य स्वीकार्नु हुन्छ ? तिनीहरूलाई कहिलेसम्म कारवाही गर्नुहुन्छ ।’
उनले आफूले आफ्नो भनेको र नातागोताका मान्छे कतै नियुक्त नगरिएको दाबी गर्दै सरकारले हाम्रो होइन राम्रो मान्छे नियुक्त गर्ने बताए ।
सरकारले मेरिटोक्रेसीका आधारमा कर्मचारीहरू नियुक्त गर्ने भन्दै आफ्ना मान्छे नियुक्त गर्छ भन्ने आरोप सही नभएको जवाफ दिए ।
उनले झालाई प्रतिप्रश्न गर्दै भने, ‘मुलुक चलाउनको लागि शक्तिशाली भनिएका देशले पनि ऋण लिन्छन्, हामीले पनि लिन्छौं । देशको स्थिति हामीले बुझेका छौं । गरिबीमा छ देश, आज यो दुईटा ठूला पार्टीको दुई तिहाइको सरकार बनेपछि यो आठ महिनामा देशको आर्थिक अवस्था जटिल ठाउँमा पुगेको हो ?’