कांग्रेस, माओवादी र एसको त्यो हस्ताक्षर, जसले गर्यो नेपाल रेडक्रसको विश्व बदनाम
काठमाडौं । नेपालमा लोकतन्त्र भन्दा दलतन्त्र हाबी छ भन्ने आरोप लाग्दै आएको छ । र, त्यो आरोप पुष्टि हुने कुरा गैर दलीय संस्थाहरूमा दलीय उपस्थिति तथा हस्तक्षेप हो ।
गत वर्ष नेपाली कांग्रेस, नेकपा (माओवादी केन्द्र) र नेकपा एसको तीन दलीय भागबन्डामा भएको नेपाल रेडक्रसका अनुहारहरूको चलन । त्यही चयनको आधारमा बुधवार इन्टनरनेसनल फेडेरेसन अफ रेड क्रसले पाँच नेपाली रेडक्रस पदाधिकारीहरूलाई कारबाही गरेको छ ।
टाइप १, टाइप २ र टाइप ७ का तीन खाले कसुरमा कारबाही गरिएको पत्र नेपाल रेडक्रसका अध्यक्ष तथा उपाध्यक्षलाई जेनेभामा मुख्यालय भएको रेडक्रसको कम्प्लायन्स एण्ड मेडिएसन कमिटीकि र्यापोर्टर क्रिस्टिना कुम्पुलाले पठाएकी छिन् ।
रोचक कुरा नेपाल रेडक्रसका अध्यक्ष प्राध्यापक सुदर्शन प्रसाद नेपालले आफैँलाई टाइप १, टाइप २ र टाइप ७ को कसुरमा कारबाहीमा परेको पत्र बुझ्न बाध्य भएका छन् ।
उनलाई नेपाली कांग्रेससँग जोडेर रेडक्रसको सिद्धान्त पुरा नगरेको, दायित्व पुरा नगरेको तथा दलीय हस्तक्षेप गरेको कसुर लागेका छन् ।
उनी बाहेक कारबाहीमा परेका नेपाली कांग्रेसको नाम जोडिएकाहरूमा विनोद कुमार बस्नेत र मनोज कुमार थापा छन् भने नेकपा (माओवादी केन्द्र) र नेकपा एसबाट क्रमशः नारायण तिम्सिना र भूपतिलाल श्रेष्ठ छन् ।
यी कारबाहीमा परेकाहरूले २०८० मा एक सहमति पत्रमा हस्ताक्षर गरेर दलीय भागबन्डा गरेका थिए । उनीहरूले गरेको सहमति पत्रको अनुसूची १ मा दलीय भागबन्डाको देखिने उदाहरण थियो ।
‘निर्वाचनमा निम्न अनुसारको समूहगत प्रतिनिधित्व सुनिश्चित गर्ने’ भनेर गरेका दलीय भागबन्डाका तीन क्लस्टर बुँदा यस्ता थिए:
– नेपाली कांग्रेसको समूहबाट अध्यक्ष, उपाध्यक्ष (खुला), उपमन्त्रीसहित जम्मा १५ जना
– नेकपा एस समूहबाट महामन्त्री, उपकोषाध्यक्षसहित जम्मा ६ जना
– नेकपा (माओवादी केन्द्र) बाट उपाध्यक्ष (महिला), कोषाध्यक्ष सहित जम्मा आठ जना
