सिन्धुपाल्चाेक । त्रिभुवन विश्वविद्यालय अन्तर्गतका क्याम्पसहरुमा भोलि हुने स्वतन्त्र विद्यार्थी युनियनको निर्वाचनमा सिन्धुपाल्चोकमा तिन क्याम्पसमा मात्रै चुनाव हुने भएको छ ।
जिल्लाका १२ सामुदायिक क्याम्पस मध्ये एउटा क्याम्पसमा चुनावी प्रक्रिया नै सुरु भएको छैन भने आठ क्याम्पसमा निर्वीरोध रुपमा स्ववियु पदाधिकारी छनोट भइसकेका छन् ।
बुधबार सदरमुकाम चौतारामा रहेको चौतारा बहुमुखी क्याम्पस,अरनिको कलेज र जलविरे भ्याली क्याम्पसमा स्ववियु चुनाव हुन लागेको हो ।
स्ववियु चुनावमा सिन्धुपाल्चोकमा सत्ता गठबन्धनका नेपाली कांग्रेस निकट नेविसंघ र एमाले निकट अनेरास्ववियु बिच तालेमेल भएको छ ।
चौतारा क्याम्पसमा अनेरास्ववियुका उमेदवार रहेका छन् भने गठबन्धनको तर्फबाट जलविरे र अरनिको कलेजमा नेविसघको तर्फबाट सभापतिको उमेदवार रहेका छन् ।
सत्ता गठबन्धनको विरुद्ध माओवादी निकट अनेरास्ववियु क्रान्तिकारी भने एक्ले चुनावी मैदानमा उत्रीएको छ । यद्पी चौतारा क्याम्पसमा भने समाजवादी निकट विद्यार्थी संगठनसँग तालमेल भएपनि समाजवादी निकटका विद्यार्थीहरुको संख्या कम रहेको छ ।
चौतारा क्याम्पसमा सबैभन्दा बढी मतदाता रहेका छन् । चौतारामा ३ सय ७१,जलविरे १ सय ४२ र अरनिको कलेजमा २ सय ७७ मतदाता रहेको क्याम्पसहरुले जानकारी दिएका छन् ।
चौतारा क्याम्पसमा क्रान्तिकारी बाट अमृत श्रेष्ठ चुनावी मैदानमा छन् भने अनेरास्ववियुबाट शुसिल तामाङ प्रतिष्पर्धामा छन् ।
त्यस्तै जलविरेमा क्रान्तिकारीबाट अशोक ढुगंना र नेविसघको तर्फबाट रामबहादुर विक उमेदवार छन् । अरनिको कलेजमा क्रान्तिकारीबाट रेनिश श्रेष्ठ र नेविसंघबाट तुषार श्रेष्ठ उमेदवार रहेका छन् ।
आठ क्याम्पसमा सर्वसम्मत
स्ववियु निर्वाचनमा सिन्धुपाल्चोकका आठ क्याम्पसमा भने यस अघि नै सर्वसम्मत रुपमा स्ववियु पदाधिकारी छनोट भइसकेका छन् । सुनकोशी क्याम्पस,ककलिङ ,ठोकर्पा,जुगल,मेलम्ची भ्याली,इन्द्रावती,सिन्धुभ्याली र अभयान्द क्याम्पसमा सर्वसम्मत नेतृत्व छनोट भएको क्याम्पसहरुले जानकारी दिएका छन् ।
निर्वीरोध भएका आठ मध्ये नेविसघ ले ककलिङ र क्रान्तिकारीले जुगल क्याम्पसमा अध्यक्ष पाएका छन् भने अन्य क्याम्पसको अध्यक्षमा अनेरास्ववियुले सभापति पाएको छ ।