काठमाडौं । राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्लेले पार्टी सभापति रवि लामिछानेलाई दुनियाँकै ठूलो अपराधी जस्तो गरेर हिजो धरपकड गरेको आरोप लगाएका छन् ।
चितवनमा आयोजित जनयात्रा शुभारम्भ कार्यक्रमलाई सम्बोधन गर्दै उनले चितवनमा आज हुने कार्यक्रममा बोल्न नदिन नै हिजो राति पक्राउ गरेको दाबी गरे ।
उनले भने, ‘७ बजेतिर फैसला आउने, दुनियाँकै ठूलो अपराधीलाई जस्तो गरी, आकाशै खस्ला जस्तो गरेर धरपकड गरियो, त्यो निन्दनीय छ । हाम्रो पार्टीले १२ बजे सचिवालयको बैठक राखेर त्यसको भर्त्सना गरेको छ । आज रविजीसँग कुरा भएको थियो, हिजो केके न होला जस्तो भनेर ल्याएका थिए, यहाँ दालभात खुवाएर राखेका छन्, आज पनि बिदा, भोलि पनि बिदा त्यसैले चितवनमा बोल्न नदिएन नै सारा राज्य लागेको भन्ने प्रमाणित भएको छ ।’
उनले रवि लामिछानेविरुद्ध हिजो आएको फैसला बहस सकिएको दुई घण्टामा लेखिसक्ने कुनै सम्भावना नभएकाले तानाबाना पहिल्यै बुनिएको देखिएको जिकिर गरे ।