बझाङ । जिल्ला अस्पताल बझाङमा एक हप्तादेखि रेविजविरुद्धको भ्याक्सिन अभाव हुँदा सेवाग्राहीलाई समस्या भएको छ । रेविजविरुद्धको भ्याक्सिन अभाव भएपछि जिल्ला अस्पताल बझाङमा रेविजको सुई लगाउन आउने बिरामीहरू त्यसै फर्कन बाध्य भएका छन् ।
अस्पतालमा एक हप्तादेखि भ्यासिक्न अभाव भएको जिल्ला अस्पताल बझाङका प्रमुख डा. नवराज जोशीले बताए । स्वास्थ्य मन्त्रालय अन्तर्गतको आपूर्ति स्वास्थ्य केन्द्र धनगढीबाट यसअघि भ्याक्सिन आउने गरेकोमा पछिल्लो एक हप्तादेखि भ्याक्सिन नआएकोले समस्या भएको उनले बताए ।
अस्पतालबाट पटक पटक भ्याक्सिन माग भए पनि उपलब्ध हुन नसकेको उनको भनाई छ । यो यस अस्पतालको मात्र समस्या नभएर प्रदेशभरिका अस्पतालहरुमा रेविज रोग विरुद्धको भ्याक्सिन अभाव रहेको समेत डा.जोशीले बताए ।
रेविजविरुद्धको भ्याक्सिन औषधि पसलहरूमा भने प्रति भाइल ६ सय रुपैयाँसम्म पर्ने गरेको छ । कुकुरले टोकेका व्यक्तिले तीन पटक रेविजविरुद्धको भ्यक्सिन लगाउनुपर्ने हुन्छ । जिल्ला अस्पतालमा दैनिक १०/ १५ जना बिरामी रेबिज रोगविरुद्धको खोप लगाउन आउने गरेका छन् ।
छविसपाथिभेरा गाउँपालिका–६ माटेसाघुँका भुवन सिंहले छोरीलाई कुकुरले टोकेपछि आइतबार रेविजविरुद्धका खोप लगाउन जिल्ला अस्पताल लगाएत जिल्लाका सबै स्वास्थ्य संस्थामा सोध्दा अभाव भएको भन्ने खबर आएपछि खोप नलगाएरै घर फर्किएको बताए ।
नेपालको संविधान २०७२ को धारा ३५ मा स्वास्थ्यसम्बन्धी हक अन्तर्गत हरेक नागरिकले आधारभूत स्वास्थ्य सेवा निःशुल्क पाउने व्यवस्था गरिएको भए तापनि सरकारी अस्पतालबाट निःशुल्क रूपमा पाउने स्वास्थ्य सेवाबाट नागरिक वञ्चित भएका हुन् ।