काठमाडौं । राष्ट्रिय क्षयरोग नियन्त्रण केन्द्रको निर्देशकको जिम्मेवारी सहसचिव डा. श्रीराम तिवारीले पाएका छन् ।
केही दिन अघि स्वास्थ्य तथा जनसंख्यामन्त्री प्रदिप पौडेलले मन्त्रस्तरीय निर्णय गर्दै उक्त जिम्मेवारी दिएका हुन् । मन्त्रालयले जिम्मेवारी दिएसँगै तिवारीले निर्देशकको जिम्मेवारी सम्हालिसकेका छन् ।
निर्देशकको जिम्मेवारी सम्हाल्दै उनले क्षयरोगका विरामी अहिले पनि समुदायमा लुकेर बसिरहेकाले पत्ता लगाएर उपचारमा ल्याउनका लागि थप कार्यक्रम ल्याउने नेपाल प्रेससँग बताए ।
डा. तिवारीले क्षयरोग पालिका निर्माण गर्ने सरकारको कार्यक्रमलाई सुदृढीकरण गरेर क्षयरोग मुक्त समाज निर्माणमा लाग्ने प्रतिवद्धता जनाए ।
उनी यस अघि गजेन्द्रनारायण सिंह अस्पताल राजबिराजमा र भरतपुर अस्पताल चितवनमा प्रमुख मेडिकल सुपरिटेण्डेन्टको जिम्मेवारीमा थिए । त्यस अघि २०७८ माघ २७ देखि २०७९ असोज ४ सम्म ८ महिना स्वास्थ्य मन्त्रालय गण्डकी प्रदेशको सचिवको जिम्मेवारी सम्हालेका थिए ।
त्यसअघि गोरखा अस्पताल, महाकाली अञ्चल अस्पताल कञ्चनपुरको प्रमुख मेडिकल सुपरिटेण्डेन्टको जिम्मेवारीमा थिए ।