पोखरा । पोखरामा जारी दोस्रो संस्करणको केपी ओली कप टी २० क्रिकेट प्रतियोगिताको सेमिफाइनल समीकरण पूरा भएको छ । बुधबार समूह चरणको अन्तिम खेलमा मालपोखरी क्रिकेट क्लबलाई ६ विकेटले हराउँदै अत्तरिया क्रिकेट एकेडेमी समूह ‘डी’ बाट सेमिफाइनल प्रवेश गरेको हो ।
समूह ‘ए’ बाट सिइसी काठमाडौं, ‘बी’ बाट गण्डकी हिरोज र ‘सी’ बाट हिमाल फ्रेन्ड्स क्रिकेट क्लबले यसअघि नै सेमिफाइनलमा स्थान सुरक्षित गरिसकेका छन् ।
सेमिफाइनलका खेल बिहीबार हुनेछ । पहिलो सेमिफाइनल खेल काठमाडौं र हिमाल क्लबबिच हुनेछ । दोस्रो सेमिफाइनल खेल गण्डकी र अत्तिरियाबिच हुने तालिका छ । मदन भण्डारी स्पोट्र्स एकेडेमीको आयोजनामा पोखरा रंगशालास्थित क्रिकेट मैदानमा जारी प्रतियोगिताको फाइनल खेल शुक्रबार हुनेछ ।
आज भएको खेलमा १२५ रनको विजयी लक्ष्य पाएको अत्तरियाले १४ ओभर १ बलमा ४ विकेट गुमाउँदै पूरा गर्यो । अत्तरियाको जितमा निश्चल क्षेत्री ३० र अर्जुन विक १२ रनमा नटआउट रहे । अभिषेक पलले ३८ रनको योगदान दिए । मालपोखरीका लागि सन्दिप खड्का, सिराज हावारी, डब्लु मलिकले समान १–१ विकेट लिए ।
त्यसअघि टस हारेर ब्याटिङको निम्तो पाएको मालपोखरी १२४ रनमा समेटिएको थियो । मालपोखरीका लागि विजय गुप्ताले सर्वाधिक ३८ रन बनाए । ओपनर सोहन कुमार यादव १६, डब्लु मलिक १७ र जितेश मन्डल १७ रनको योगदान दिए । अत्तरियाका लागि अर्जुन विक, हिकमत महर, शौर्या श्रेष्ठ र सुशिल साउदले समान २–२ तथा भोजराज भट्टले १ विकेट लिए ।
चैत २३ गतेदेखी सञ्चालन भएको प्रतियोगितामा कुल १६ टिमको सहभागिता रहेको थियो । हरेक समूहको विजेताले अन्तिम चारमा स्थान बनाएका हुन् । प्रतियोगिताको विजेताले १० लाख र उपविजेताले ५ लाख रुपैयाँ पाउनेछन् ।