काठमाडौं । राष्ट्रिय स्वतन्त्र पार्टी (रास्वपा)ले जनताको कुरा सुन्ने यात्रा, जनयात्राको सुरुआत गर्ने भएको छ। हिजो बसेको केन्द्रीय समितिको बैठकले चैत्र २३ गते चितवनबाट जनयात्रा थाल्ने निर्णय गरेको रास्वपा सांसद गणेश पराजुलीले बताए।
प्रतिनिधि सभाको बैठकपछि सञ्चारकर्मीहरूसँग कुरा गर्दै जनयात्राको क्रममा जनताको कुरा सुन्ने र पार्टीको आगामी रणनीति बनाउने मुख्य लक्ष्य रहेको बताए।
उनले जनयात्राबारे यसरी सुनाए
हिजोबाट पार्टी सभापति जिम्मेवारीमा फर्किसक्नुभएको छ। दुई तिहाइको सरकार र तीन दलीय सिन्डिकेटले रास्वपालाई सर्वदलीय बैठकमा नबोलाएर, रास्वपाले पार्टी स्थापना कालदेखि नै भन्दै आएको र दस्ताबेजमै उल्लेख भएको विषयलाई नजरअन्दाज गरेर हामीलाई लोकतन्त्रवादी हो कि होइन भन्ने कुरा कुरामा चर्चा गरियो।
रास्वपामाथि भएको हमला भइरहे पनि जनताको विश्वास पूरा गर्नको लागि राष्ट्रिय भेलाले तय गरेको सबै कार्यक्रमलाई पूर्णता दिन र महाधिवेशनलाई समयमै सम्पन्न गर्नको लागि हिजोको केन्द्रीय समितिको बैठकले तय गरिसकेको छ। हामीले २३ गतेबाट जनयात्रा सुरु गर्दैछौं।
जनताको आवाज लिएर जनतासँग संवाद गरेर आगामी दिनमा तय गर्नुपर्ने रणनीति, शासकीय स्वरूप प्रत्यक्ष निर्वाचित प्रधानमन्त्री बनाउने हो कि राष्ट्रपति बनाउने हो कि कति सांसद बनाउने ? प्रदेश संरचना खारेज गर्ने हो भने कसरी गर्ने, त्यसलाई कसरी पुनर्संरचना गर्ने भन्नेबारे जनतामाझ गएर जनताको सुझाव लिन्छौँ।
पछिल्ला दिनमा जनतामा बढेको वितृष्णा र वितृष्णा हुनको कारण अहिले शासकीय स्वरूपमा लोकतन्त्रको नाममा लुटतन्त्र मच्चाउने प्रवृत्ति देखियो। त्यसलाई रोकेर सुधार गर्नको लागि के गर्नुपर्छ भन्नेबारे सुझाव लिनको लागि हामी जनयात्रामा जान लागेका हौंं।