काठमाडौं । पार्टी फुटाएर माधव नेपालले अर्को पार्टी खोलेदेखि एमाले अध्यक्ष केपी ओली र नेपालबीच झण्डै साढे ३ वर्षदेखि पानी बाराबारको अवस्था छ ।
तर, आज प्रधानमन्त्रीसमेत ओली नेकपा एकीकृत समाजवादीको केन्द्रीय कार्यालय आलोकनगरमा पुगे । ओली हिजो दिवंगत भएका नेकपा एस सम्वद्ध वरिष्ठ पत्रकार तथा लेखक कमल कोइरालालाई अन्तिम श्रद्धाञ्जली दिन पुगेका थिए ।
उनी पार्टी कार्यालयभित्रै छिरे, शुक्रबार आगजनीबाट क्षति पुगेको संरचना अवलोकन गरेर आवश्यक जानकारी गरे ।
ओलीले नेकपा एसका अध्यक्ष माधव नेपाल, सम्मानित नेता झलनाथ खनाललगायत नेतासँग बसेर कुराकानी पनि गरे । ओली पुगेकै बेला एमालेबाट निकालिएका डा. भीम रावल पनि त्यहाँ थिए ।
ओली, नेपाल, खनाल र रावलसहितको फोटो राखेर नेकपा एसका उपाध्यक्ष तथा प्रवक्ता प्रकाश ज्वालाले फेसबुकमा लेखेका छन्, ‘आइस ब्रेक !’