प्रधानमन्त्रीले हिंसा भड्काउने अभिव्यक्ति दिएको भन्दै राजसंस्था पु:स्थापना आन्दोलन समितिको विरोध

काठमाडौं । राजतन्त्र पुन:स्थापनाका लागि गठित संयुक्त जनआन्दोलन परिचालन समितिले प्रधानमन्त्री केपी शर्मा ओलीबाट पटकपटक हिंसा भड्काउने अभिव्यक्ति आएको भन्दै ध्यानाकर्षण जनाएको छ ।

हिजो ओलीले राजावादी आन्दोलनलाई निस्तेज पार्न १५ गते दिनभर काठमाडौं नियन्त्रणमा हुनुपर्ने भन्दै एमाले पंक्तिलाई हिजो निर्देशन दिएका थिए ।

आन्दोलन परिचालन समितिका प्रवक्ता स्वागत नेपालले एक विज्ञप्ति निकाल्दै तीनकुनेको प्रदर्शनअघि पनि प्रधानमन्त्रीले आफ्ना कार्यकर्तालाई राजसंस्थावादीलाई ‘बाघले झम्टिएजस्तो झम्टिनू’ भनेको स्मरण गरेका छन् ।

राजसंस्था पुनर्स्थापनाको आन्दोलन शान्तिपूर्ण हुने भन्दै अशान्ति मच्चाउन खोजिए सत्ताधारीहरूलाई नेटो कटाउने शक्ति जनतासँग रहेको विज्ञप्तिमा चेतावनी दिएको छ ।