‘सगरमाथा संवादमा एकजना पनि सरकार प्रमुख किन उपस्थित गराउन नसकेको ?’
काठमाडौं । नेकपा एकीकृत समाजवादीका सांसद शेरबहादुर कुँवरले सगरमाथा संवादमा सार्क मुलुकका समेत एकजना सरकार प्रमुखलाई उपस्थित गराउन नसकेको भन्दै आलोचना गरेका छन् ।
प्रतिनिधिसभाको बैठकमा बोल्दै यो कार्यक्रमलाई सफल बनाउन कूटनीतिक नियोगहरूलाई किन परिचालन नगरेको ? भन्दै उनले प्रश्न गरे ।
कुँवरले भने, ‘२ गतेदेखि आयोजना गरिएको सगरमाथा संवाद २५ बुँदे घोषणापत्र जारी गर्दै सम्पन्न गरिएको छ । जलवायुसम्बन्धी हाम्रा आवाज र मुद्दाहरूलाई विश्वसामु हामीले उजागर पनि गर्यौं । पाँच वर्षको तयारीसाथ गरिएको सगरमाथि संवाद जनताले रुचिपूर्वक प्रतीक्षा गरेका थिए ।’
प्रधानमन्त्री स्वयंले आह्वान गरेको संवादमा सार्क मुलुक बाहिरका प्रधानमन्त्री सरकार प्रमुखलाई सहभागी गराउन नसकेपनि सार्क राष्ट्रभित्रकै सरकार प्रमुखहरु सहभागी गराउन नसकेको उनले आलोचना गरे ।
कुँवरले थपे, ‘आफैं अध्यक्ष भएको सार्क मुलुकका एक जना पनि सरकार प्रमुखलाई उपस्थिति गराउन नसक्नुलाई राष्ट्रिय असक्षमता वा कूटनीतिक असफलता के भन्ने ? सरकारले यो कार्यक्रमलाई सफल बनाउनको लागि कूटनीतिक नियोगहरूलाई किन परिचालन गर्न सकेन ? सरकारको जवाफ चाहिन्छ ।’