कप्तान इन्दुको फर्मले नेपाललाई मिलेको राहत

काठमाडौं । नेपाल महिला क्रिकेटमा कोही बढी आलोचित थियो त कप्तान इन्दु बर्मा । नेपाली टोलीले सुखद नतिजा ल्याउन नसक्दा कप्तान इन्दुलाई सामाजिक सञ्जालमा गालीको वर्षा हुन्थ्यो ।

तर, थाइल्याण्डमा भएको महिला टी-२० विश्वकप एसिया छनोटमा उनकै सुझबुझपूर्ण ब्याटिङकै कारण नेपालले ऐतिहासिक सफलता पायो । नेपालले पहिलोपटक महिला टी-२० विश्वकपको ग्लोबल छनोटमा स्थान पक्का गर्यो ।

छनोटमा नेपालले ३ खेलमा जित निकाल्यो भने एक खेलमा हार बेहोर्दा एक खेल वर्षाका कारण प्रभावित भयो । ४ वटै खेलमा इन्दुको ब्याटिङ उत्कृष्ट रह्यो । उनी ४ वटै इनिङमा नटआउट रहिन् । अन्य ब्याटर क्रिजमा जम्न नसक्दा इन्दुले सुझबुझपूर्ण ब्याटिङ गरिन् ।

बहराइनविरुद्धको पहिलो खेलमा ७ र दोस्रो खेलमा २४ रनमा अविजित रहिन् । बहराइनसँगको दोस्रो खेलमा ७ बलमा अविजित २४ रन बनाउँदै सुपर—३ को ढोका खोलेकी थिइन् । सोमबार भएको युएईविरुद्धको ऐतिहासिक जितमा इ्रन्दु नायक बनिन् ।

उनले २८ बलमा अविजित ३० रन बनाउँदै नेपाललाई ऐतिहासिक उपलब्धी दिलाइन् । उक्त खेलमा उनी प्लेयर अफ द म्याच घोषित भइन् । तर, उक्त अवार्ड उनले ४ विकेट लिएकी मनिषा उपाध्ययलाई सुम्पिइन् ।