‘कांग्रेस, एमाले र माओवादीकोमा ट्रकमा प्रहरी पठाइयो, हाम्रोमा तोडफोड गर्न गए हुन्थ्योजस्तो गरियो’ (भिडिओ)
काठमाडौं । नेकपा एकीकृत समाजवादीका अध्यक्ष माधवकुमार नेपालले चैत्र १५ गतेको घटनामा राज्यले आफ्नो पार्टी कार्यालयको उचित सुरक्षा गर्न नसकेको गुनासो गरेका छन् ।
आइतबार काठमाठौंमा नेपाल आदिवासी जनजाति महासंघ (समाजवादी) को बागमती प्रदेश भेला उद्घाटन गर्दै उनले कांग्रेस, एमाले र माओवादीको पार्टी कार्यालयमा पर्याप्त सुरक्षाकर्मी तैनाथ गरेपनि आफ्नो पार्टी कार्यालयतर्फ उल्टै आन्दोलनकारीलाई खुल्ला छाडिदिएको आरोप लगाए ।
‘सरकारले कांग्रेस, एमाले, माओवादीको अफिसमा ट्रकसहित सुरक्षाको व्यवस्था गर्यो । तर, हाम्रो पार्टी अफिसनजिकै सुरूदेखि चर्कोचर्को भाषण गरेको सुन्दासुन्दै मान्छे (आन्दोलनकारी) लाई पुलको छेउबाट यता गए हुन्थ्यो भन्ने चाहना राखेर छाडियो’, उनको जिकिर थियो ।
आफ्नो कार्यालयमा तोडफोड गर्दै कम्प्युटर, मोबाइल, पंखा साथै फाइल समेत चोरी भएको भन्दै उनले क्षतिपूर्ति माग गरेका छन् ।
चैत १५ गतेको घटनामा जोडिएका सवैले जिम्मेवारी लिनुपर्ने र दोषीलाई सरकारले कारवाही गर्नुपर्नेमा उनले जोड दिए । अराजक व्यक्ति बोकेर राजतन्त्र पुनर्वहाली नहुने नेपालले बताए ।